كوتش لوكاس .. المحترم💛💚
في ناس بتدرب عشان تاخد قروش، وفي ناس بتدرب عشان تاخد شهرة..
لكن في زول واحد بيدرب عشان بيحب، عشان التراب دا ترابو، وعشان الشعار دا شعارو.
كوتش لوكاس ما مدرب جابوهو من برة، كوتش لوكاس اتولد هنا، اتربى هنا، في شوارع الدمازين دي، شرب من مويتها، ولعب في ترابها، وكبر على حب العامل.
هو ما شاف العامل فريق كورة ساي، هو شافو بيتو، شافو أهلو، شافو حلمو الصغير الكان بيحلم بيهو وهو شافع صغير.
عشان كدة لمن وقف قدام اللعيبة الليلة، ما كان بيشرح خطة ساي، كان بيوصي في أولادو، كان بيقول ليهم بي عيونو قبل لسانو:
“ألعبو بي قلبكم، العبو عشان الدمازين، عشان أمهاتكم القاعدات يدعو ليكم، عشان أي زول جاي يتفرج فيكم الليلة”
واللعيبة سمعوه، وحسوهو، ولعبو بي روحهم..
3 أهداف؟ لا والله، دي ما 3 أهداف، دي 3 رسائل:
الأولى قالت: نحن رجال
التانية قالت: نحن ما بننكسر
التالتة قالت: العامل راجع، والجاي أخطر
يا كوتش،
نحن كمشجعين ما بنعرف نقول كلام كبير، لكن بنعرف نحس.
وحسينا بي تعبك، حسينا بي سهرك، حسينا بي قلبك الواجعك على الفريق أكتر مننا كلنا.
انت ما رفعت فريق فوق ساي، انت رفعت راس مدينة كاملة، خليت الشافع الصغير في الحلة يحلم يبقى زي لعيبة العامل، وخليت الكبير يفتخر يقول “دا فريقنا”.
شكراً يا ولدنا، شكراً يا كبيرنا، شكراً يا كوتشنا.
الدمازين كلها وراك، والعامل بيك فوق، والجاي والله أخطر 🔥⚽
